CAGAYAN DE ORO CITY – Dili palabyon ni City Mayor Oscar Moreno ang pagsilot kon angayang batok sa regular enforcer sa Roads and Traffic Administration o RTA nga nadakpan nangilkil ug nagbaton sa armas diha sa Licoan-Recto Avenue ning syudad.
Kini human nakadakop si RTA enforcer Barry Moore Saludares nga taga-Xavier Heights sa motorista nga nakasupak sa traffic law apan sekreto nga nangayog’ bayad alang sa iyang personal nga kagustuhan.
Miingon si Moreno nga gitahasan niya ang kadagkuan sa RTA alang sa tukmang aksyon.
Samtang gipanganti ni RTA Deputy for Administration Doy Ramero nga dili na makabalik sa iyang trabaho si Saludares kinsa nadakpan sa entrapment operation ug nakumpiskahag armas ug mga bala ning syudad.
Gibutyag ni Ramero nga mas makapasabot pa gayud pagpalagpot sa enforcer sa serbisyo kung uganing mahukman kining guilty sa korte.
Gitin-aw usab ni Ramero nga wala silay bisan usa ka enforcer nga gitugutang magdala sa armas samtang anaa sa trabaho.
Dugtong niini,gitin-aw sa kadagkuan sa Police Regional Office nga balidong rason ang pagka sakop sa RTA enforcer nga may bahad sa kinabuhi aron mabitbit sa armas samtang anaa sa trabaho.
Gibutyag ni PRO 10 spokesperson Capt. Francisco Sabud Jr. nga gikinahanglan nga magbaton sa hustong dukumento ang usa ka individual una sila tugutang magdala sa armas.
Matud ni Sabud nga kasong illegal position of firearmas ang atubang sa tawong maghupot sa armas nga walay papeles.
Una niini,nanghimakak ang suspek sa pasangil sa motorista ug namugos nga nagbaton kini’g kasuko ngadto kaniya.
Hisayrang giangkon usab ni Saludares nga siya ang nagdala sa kalibre 45 nga armas kay isip panalipod sa iyang kaugalingon batok sa mga nagbahad ug nagyaga-yaga kaniya nga pipila ka motorista nga ilang masita sa kadalanan.
