CAGAYAN DE ORO CITY – Gikasuhan na ang RTA enforcer nga nadakpan sa gihimong entrapment operation sa mga pulis tungod sa gikaingong pagpangilkil sa driver violator sa Ipil St. Brgy Carmen ning syudad.
Giila ang suspek nga si Emmanuel Umas-as, 30-anyos, menyo nga taga Zone 3 Brgy Bulua ning syudad.
Gibutyag ni Cogon Police Station Commander Capt. Ernesto Sanchez nga kasong robbery extortion ang ilang gipasaka batok Umas-as.
Dugtong pa ni Capt. Sanchez nga human sa entrapment operation, daghan ang mipaabot sa ila sa impormasyon nga daghan na ang nabiktima sa maong suspek.
Samtang dismayado ang RTA sa gidangatan sa ilang enforcer nga nasikop tungod sa giingong pagpangilkil sa driver violator ning syudad.
Apan miingon si Doy Ramero, RTA Deputy for Administration nga ila na lamang itugyan sa mga pulis ang dagan sa kaso ni Umas-as.
Nanawagan usab si Ramero sa katawhan nga mosumbong sa ilang buhatan kon may masayran nga enforcers nga gabuhat sa kahiwian aron masumpo ang dautang binuhatan.
