CAGAYAN DE ORO CITY – Gusto ni City Councilor Roger Abaday nga magbaton sa kaugalingong armas ang RTA enforcers sa syudad.
Kini aron dunay magamit nga proteksyon batok sa mga tawo nga nagtinguha sa ilang kinabuhi samtang gipatuman ang mando sa DILG nga road clearing operation sa syudad.
Gihimo ni Abaday ang sugyot gumikan sa kamatayon ni RTA enforcer Mark Langam IV diin siya gipusil samtang mihimo’g clearing operatios sa Brgy Puerto sa miaging semana.
Samtang supak si City Councilor Romeo Calizo, chairman sa city council committee on police, fire and public safety sa sugyot nga armasan ang mga traffic enforcer sa syudad.
Gibutyag ni Calizo nga moagi sa taas nga proseso ug trainings ayha mahataga’g katumanan ang maong laraw.
Siya miingon nga maoy angayang buhatan sa mga personahe sa Road and Traffic Administration ang pagpaubos kanila sa seminar kalabot na sa pagbaton sa maayong pamatasan.
Asoy niini nga daghan siya’g nadawatan nga reklamo gikan sa publiko batok sa pipila ka traffic enforcer nga giingong walay batasan ug kapayason.
Samtang gusto usab ni City Councilor Edgar Cabanlas nga kabahin sa moabag ang mga sundalo sa 4th ID,Philippine Army sa road clearing operations sa syudad.
Kini human nakita ni Cabanlas ang dakong kakulangon sa RTA enforcers ilabina sa ilang seguridad kabahin sa ilang paglusad sa mga operasyon sa kadalanan.
Miingon si Cabanlas nga kinahanglang mohimo na’g lakang ang lokal nga kagamhanan sa syudad ilabina nga duha na ka kinabuhi sa traffic enforcer ang nakalas tungod lang sa pagpatuman sa balaod.
Nagtoo si Cabanlas nga adunay kataha ang mga apektado sa clearing operation kon pulis o sundalo ang mamadlong sa kadalanan kon itandi sa mga sakop sa RTA diin handheld radio lang ang ilang hinagiban.
