CAGAYAN DE ORO CITY – Wala pa’y komentong-opisyal nga gilugwa ang Roads and Traffic Administration/ RTA kabahin sa viral video diin naglantugi ang usa ka motorista ug pipila ka enforcers sa usa sa mga kalsada sa dakbayan.
Kini human madungog sa video nga kuha ni Edhels Salise Dalute nga nagkalalis ang duha ka panig kabahin sa giingong parking issue rason nga tuyo kuhaon sa RTA enforcers ang lisensiya sa motorista.
Apan mi-rebenta ang motorista nga dili niya basta-basta ihatag kay wala man kini nahimong kasupakan sa balaod-trapiko.
Gipamugos sa motorista nga wala kini mohimo’g pag-parking apan adunay gi-pick up ka kadyot sa lugar diin maoy pagsita usab sa road enforcers.
Sulti usab sa usa sa mga RTA enforcer nga dili aplikabol sa syudad ang gipamugos sa motorista nga no minutes,no seconds parking policy nga susama gipatuman didto sa Bukidnon.
Dugtong niini, wala pa’y gipalanog nga reaksyon si RTA manager Engr Nonito Oclarit kabahin sa viral video sa iyang mga sakop kuyog ang motorista nga ulahi na nagpakita sa iyang lisensiya.
Hisayrang miaksyo’g kalma ang duha ka panig dihang gisulti na sa motorista nga kargado sa pasahero nga person with disabilities ang sakyanan.
