CAGAYAN DE ORO CITY- Gitawag ni City administrator Teddy Sabugaa nga talawan ang suspek nga mipatay sa traffic enforcer nga si Mark Langam IV samtang nagpahigayon sa clearing operation diha sa Brgy Puerto ning syudad.
Nangugat si Sabugaa sa pagkondinar sa dili tawhanon nga binuhatan ilabina nga igo lamang gihimo ni Langam ang iyang trabaho.
Dugtong niini, gipanganti ni Sabugaa nga dili mohunong sa pagpatuman ang lokal nga kagamhanan sa clearing operation maseguro lamang ang “Hapsay nga Dalan” sa dakbayan.
Kahinumduman nga mohatag sa P500-mil nga reward ang city govt sa makatudlo sa suspek sa pagpatay sa biktima.
Samtang makatabang pagdako ang P500-mil nga reward money sa pagsulbad sa kasong pagpatay kang Mark Langam diha sa Brgy Puerto sa syudad.
Miingon si si City Police Director Colonel Henry Dampal nga madasig ang mga nakasaksi sa krimen nga mo-kooperar sa imbestigasyon sa kapolisan aron maila ang suspetsado.
Una nang gibutyag ni Dampal nga blangko pa sila sa identity sa suspek apan gipanganti niini nga ilang mahataga’g hustisya ang kamatayon sa traffic enforcer subay sa kamanduan ni City Mayor Oscar Moreno.
Hisayran nga nakuha na sa mga imbestigador ang kopya sa closed-circuit television camera nga makatabang sa imbestigasyon.
Samtang wala pa’y hukom ang RTA kung uyunan ba nila ang laraw sa City Council nga armasan ang mga RTA enforcers.
Gibutyag ni Doy Ramero, RTA deputy for administration nga ila pang hunahunaon pag-ayo ang maong tinguha ilabina nga gikinahanglan pa kinig daghang mga pagtoon.
Hinoon giangkon ni Ramero nga may kabalaka sila nga magbaton sa armas ang enforcers kay dili nila tahas ang paghatag sa seguridad apan pag isyu sa traffic violations ngadto sa pipila ka mga motorista sa syudad.
