CAGAYAN DE ORO CITY- Gisalig na ni Police Regional Office 10 Director Brig Gen Rolando Anduyan sa Regional Internal Affairs o RIAS ang pag-imbestigar sa kontrobersyal nga pagdakop sa suspek pagpatay kang RTA enforcer Mark Langam IV ning syudad.
Kini human unang mi-reklamo sa Bombo Radyo si Ana Nala nga gipugos siya’g paangkon aron itudlo ang iyang kaipon nga si John Mark Rayon nga suspek pagpusil kang Langam sa Brgy Puerto sa miaging Pebrero 28.
Miingon si Anduyan nga gilikayan niini nga manginlabot sa kontrobersya sa Puerto Police Station aron dili mahimong bayas sa imbestigasyon.
Samtang na-konsensiya ang kaipon sa suspek pagpatay sa RTA enforcer rason nga gibakwi niini ang unang gisulti atubangan sa mga pulis diha sa Puerto Police Station ning syudad.
Kini human unang giakusar sa mga pulis nga si John Mark Rayon ang nakit-an sa mga testigo ug nakuha sa CCTV camera nga mipusil-patay kang Langam sa Brgy Puerto sa miaging bulan.
Miingon si Ana Nala nga reklamo sa pagpasagad isip bana lamang ang iyang gisumbong sa kapolisan apan pugsanon kining gipaangkon aron idu-ot si Rayon sa kamatayon ni Langam.
Kini ang rason nga manumbong usab sa pipila ka pulis nga giingong nanghulga ug naghinadlok kanila.
