Naka-deploy na ang mga sakop sa Roads and Traffic Administration (RTA) sa mga pangunang entry points ug kadalanan sa Cagayan de Oro subay sa pagsugod sa 30th Vice Mayors’ League of the Philippines (VMLP) National Convention.
Gisulti ni RTA Department Manager Benedicto “Doy” Ramiro nga gipahugtan na sa mobile ug stationary units sa buhatan ang pag-monitor sa Laguindingan Airport, Macabalan Port, ingon man sa Eastbound ug Westbound terminals aron sa pagsugat sa mga bisita.
Gitin-aw ni Ramiro nga walay gipatuman nga mga road closure o re-routing scheme tungod kay nakapokus sa usa ka lugar ang maong kombensyon, apan andam ang maong buhatan nga mohimo og mga adjustment kun adunay matala nga pagkabukog sa trapiko.
Hinoon, gipasalig sa RTA nga magpabiling nakasubay ang buhatan diha sa Command Center kauban ang ilang team leader sa ground aron maseguro ang hapsay nga pagbiyahe sa mga delegado ngadto sa mga akomodasyon.
