CAGAYAN DE ORO CITY – Dili makapaluya sa Roads and Traffic Administration o RTA ang mga batikos nga nadawatan sa social media diin viral ang pakigsumbagay sa duha nila ka personahe ngadto sa motorista sa Corrales Extension ning syudad sa miaging semana.

Kini human unang nakahimo’g one way traffic violation ang motorista hinungdan gisita sa RTA traffic enforcer aron makorehian ang maong kasaypanan.

Miingon si RTA spokesperson James Andrade nga imbis nga gitabangan sa ilang mga personahe ang motorista,kalit na hinoon kining nanumbag nga nag-resulta sa komosyon nga nakuhaan sa video ug nagkatag sa social media.

Siya miingon nga igo lang mi-depensa ang ilang mga personahe kay nagpungasi na ang mga kinomo sa suspek ayha nabadlong sa mga pulis gikan sa outpost sa maong lugar.

Gipadumduman usab sa RTA ang ilang mga personahe nga kanunay’ng mopatuman sa maximum tolerance aron mapadali ang pag-neutralize sa pipila ka motorista nga arogante ug walay tahod sa balaod trapiko.