CAGAYAN DE ORO CITY-Gilangkat na sa trabaho sa Roads and Traffic and Administration o RTA ang ilang enforcer nga unang nasikop nga naggamit sa gidiling droga diha sa Gumamela Street,Brgy Carmen ning syudad.
Kini human unang nakasuhan sa kapolisan si kanhi RTA enforcer Risley Maisog tungod sa pagkasikop nga akto nag-suyop sa gitoohang shabu sa miaging semana.
Gibutyag ni RTA administrator Engr Nonito Oclarit nga dili lamang si Maisog ang mahimong matangtang sa trabaho kon duna pa’y masapon nga ilang kauban naggamit sa gidiling droga.
Miprangka si Oclarit nga diretsong pagkatangtang sa trabaho ang dangatan sa bisan kinsa nga enforcer nga masapon mogamit o mamaligya’g gidiling droga.
Samtang namiligro nga matangtang sa trabaho si RTA enforcer Rex Dignos nga giakusahan sa pagpangilkil sa taxi driver nga una niyang nadakpan diha sa dalang Recto sa syudad sa miaging Setyembre ning tuiga.
Kini human may napanday na nga rekomendasyon ang kadagkuan ang RTA kabahin sa akusasyon nga giatubang ni Dignos.
Miingon si Oclarit nga gi-relib nila si Dignos sa ‘field work’ ug gi-destino sa general services samtang pending ang kaso niini sa buhatan ni City Mayor Oscar Moreno.
Una nang nagdumili si Dignos paghatag komento kabahin sa pasangil dihang gitinguha sa Bombo Radyo nga mapadungog ang tubag niini.
