Gidungog sa Regional Trial Court (RTC) sa Lapu-Lapu City ang mosyon nga ibasura ang mga warrant of arrest batok sa kontraktor nga si Sarah Discaya may kalabotan sa P96.5-milyon nga “ghost” flood control project sa Davao Occidental, ning adlawa.
Gi-apelar ni Atty. Michael David nga idismis ang warrant of arrest batok sa iyang kliyente nga unang nadakpan ug napriso niadtong miaging bulan tungod sa ghost flood control project sa probinsya.
Unang mipasaka’g mosyon ang legal counsel ni DPWH District Engineer Rodrigo Larete ug walo pa ka opisyal sa Department of Public Works and Highways (DPWH) Davao Region aron ibasura ang information ug mga warrant of arrest batok sa ilang mga kliyente.
Namugos ang mga abogado nga walay hurisdiksiyon ang RTC Branch 27 sa Lapu-Lapu City sa pagdungog sa kaso tungod kay ang mga akusado dili man high-ranking officials ug adunay salary grade nga mas ubos sa 27.
Ang labing taas nga opisyal nga nasang-atan sa kaso mao si Larete nga adunay salary grade nga 25.
