CAGAYAN DE ORO CITY – Mihangyo karon ang milangkob sa RTF-ELCAC Northern Mindanao sa mga donasyon gikan sa katawhan nga mahatag ngadto sa libuang pamilya nga apektado sa bagyong Odette sa Caraga region.
Gipalanog ni 403rd IB commander Brig Gen Ferdinand Barandon Jr ang apelar nunot sa ilang opisyal nga paglusad sa call for donation alang sa mga biktima sa bagyo diha sa Camp Evangelista ning syudad kagahapong adlawa.
Miingon si Barandon nga kuyog sa ubang ahensiya sa gobierno,unta dili ihikaw sa katawhan ang ilang tabang sama sa gihimo nila kaniadto nga pagtunol-ayuda sa mga biktima sa bagyo sa Cagayan Valley Province sa miaging tuig.
Samtang moduyog ang city govt sa ilusad nga relief operations aron makatigom sa mga ayuda nga itabang sa mga pamilya nga grabe ka apektado sa paghapak sa bagyong Odette sa Caraga region.
Miingon si City Mayor Oscar Moreno nga gitahasan niya niini si city administrator Teddy Sabugaa aron mahan-ay ang maong kalihukan ug mapasayon sa mga modonar sa ilang mga itabang sa mga biktima.
Nagpasalamat na lang gani ang mayor nga bisan kon gibaha ang 7-mil ka pamilya sa dakbayan apan wala kini makaangkon sa dagkong kadaot sama sa ubang rehiyon nga naagian sa pagbaha sa miaging semana.
Samtang gipakatag sa NEDA-10 ang ilang inspection teams sa lima ka probinsya ug duha ka highly urbanized cities aron sutaon ang actual nga damyos nga nahiaguman sa paghapak sa bagyong Odette sa rehiyon.
Miingon si NEDA 10 regional director Maria Faye Cariño nga tuyo niini nga matumbok ang kadako sa damyos ug kon unsa usab nga tabang ang angay mahatag sa mga apektadong sektor sa maong kalamaidad.
Una nang nagbaton sa pipial ka damyos sa imprastraktura ug agricukultura apan wala pa’y napagawas niini ang DPWH-10 ug DA-Northern Mindanao.
Gawas niini,may namatay usab nga halos napulo ka tawo tungod sa epekto sa bagyo sa miaging semana.
