CAGAYAN DE ORO CITY – Pabiling detinado ang red RTMI bus driver nga nakabangga-patay sa duha ka pasahero nga sakay sa bau-bao o tricab sa highway sa Baloi,Brgy Tablon sa syudad.
Giila ni City Traffic Enforcement Unit investigator Police Staff Sgt Jun Rey Caday ang namatay’ng mga biktima nga sila Rex Abriso ug Emily de la Cruz Real nga pulos nagpuyo sa lungsod sa Tagoloan,Misamis Oriental.
Miingon si Caday nga unang mihangyo si Abriso sa tricab driver nga si Roy Acordo nga ipatabok sila sa pikas lane tungod sa pagbaha hinungdang nabanggaan bus nga gimaneho usab ni Cestino Lago nga nagpuyo sa Brgy Tablon sa dakbayan.
Siya miingon nga dead on the spot si Abriso samtang nadala pa sa ospital si Real ayha hingpit nabugtuan sa kinabuhi.
Samtang ubos pa sa medikasyon si Acordo ug kaipon niini nga si Darly Pacquiao apan nakauli na laing pasahero nga si Angelita Pamon nga nagpuyo gihapon sa lungsod sa Tagoloan.
