(Update) CAGAYAN DE ORO CITY – Pasiunang gitunulan sa kompanyang Rural Transit Mindanao Incorporated o RTMI sa tag-gatos-mil ka pesos ang tagsa-tagsa ka pamilya sa lima ka tawo nga namatay tungod sa bangga sa passenger bus ug fish carrier sa Brgy Burnay,Gitagum,Misamis Oriental.
Kini maoy gisulti ni Gitagum Police Station commander Police Maj. Dennis Cerilla human sila nagka-estorya sa opisyal sa RTMI nga gipadalikyat sa ilang buhatan kagahapong adlawa.
Miingon si Cerilla nga gitubag usab sa kompanya ang tanang obligasyon sa paghaya ug paglubong sa mga namatay ingon man kadtong mga nadala sa ospital.
Sa 11 ka mga samaron,6 na kanila ang nakagawas samtang laing 5 ang nagpabilin pa sa nagkadaiyang ospital.
Dumduman nga maoy namatay sa panagbangga sa bus ug fish carrier ang mga driver niini nga sila Rovel Pagasian nga taga-Iligan City ug Silvino Flores Jr nga taga- Zamboanga del Sur.
Namatay usab ang mga pasahero nga sila Sur;Lorenzo Ejan nga taga-Brgy Bagong Taas,Valencia City, Bukidnon,Thelma Galleon ug Margarita Tagalog gikan usab sa Zamboanga del Sur.
Hisayrang subay sa dash cam video,mismo ang fish car ang misungag sa bus hinungdan sa aksidente.
