Purong estorya lang ug dili kumbinsido ang grupong Artikulo Onse nga makahatag og daghang trabaho sa mga Pilipino ang proyektong Pax Silica tungod kay sulod sa 50 ka tuig nga pag ilis ilis og administrasyon sa nasud wala gihapon kini mahitabo.

Gipamatuod ni Artikulo Onse Convenor Leody De Guzman nga padayon gihapon ang 13 milyon ka walay trabaho ug kuwang sa kita nga mga mamumuo samtang moabot sa 1 milyon matag tuig ang napugos sa paglarga sa gawas sa nasud aron manarbaho.

Gipasabot ni De Guzman nga kutob ra sa construction ug labing ubos nga trabaho ang makuha sa mga Pilipino sa pagtukod sa 1,619 ka ektarya nga pasilidad tungod kay itago sa mga langyaw ang sekreto sa paggama og high tech nga semiconductor ug mobiya ra gihapon kini kon mahurot na ang mga mineral sa nasud.

Gumikan sa kawalay programa sa gobyerno sa pagpalambo sa kaugalingong industriya sama sa nahitabo kaniadto sa Intel ug Texas Instruments, wala na naglaom ang grupo nga adunay maayong kausaban ug tinuod nga pagbalhin sa teknolohiya nga dala ang maong proyekto.