CAGAYAN DE ORO CITY – Panguluhan sa kanhi diocesan priest nga karon auxilliary bishop na sa Catholic Diocese of Sacramento sa California,USA ang concelebrated o high holy mass sa kapistahan sa patron Senior San Agustin sa katedral sa dakbayan ugmang adlawa.
Maoy gitumbok ni Cagayan de Oro Archdiocese Archbishop Jose Cabantan,D.D si Auxiliary Bishop Rey Bersabal nga miuli’g tuyo sa Pilipinas alang sa mga buluhatong simbahan nga naglakip na niini ang pakigsaulog sa kapistahan sa dakbayan.
Miingon si Cabantan nga bulahan ang katawhan kay nagsaulog ang simbahan sa kapistahan sa syudad kinuyugan ni Bersabal kinsa unang gi-ordinarhan pagka-pari sa Archdiocese of Cagayan de Oro niadtong Abril 29, 1991.
Si Bersabal nga lumad taga-Magsaysay,Misamis Oriental ang nagtungha sa iyang pagka-pari sa San Jose de Mindanao Seminary gikan kursong Pilosopiya sa Xavier University ning syudad.
Sa dili pa ang misa-konselebrada ni Bersabal kinuyugan ni Cabantan ug uban pang kaparian,may ilusad una ang simbahan nga fluvial procession sa sayo sa buntag diin ipatuman ang signal jamming aron masiguro ang seguridad sa mga deboto nga maki-piyesta ugmang adlawa.
