“We are in the right direction!” mao kini ang komentaryo ni PRO‑10 Spokesperson PMaj Joan Navarro samtang iyang gipasabot ang resulta sa World Travel Index nga naglakip sa Cagayan de Oro City sa ubos nga ranking sa safety sa mga syudad sa Pilipinas.
Sa interbyu sa Bombo Radyo, giingon ni Navarro nga ang maong resulta dili angay sabton nga negatibo lamang.
Base sa ilang assessment, anaa sa mid‑rank ang kahimtangan sa seguridad sa dakbayan ug nagpakita kini nga nagpadayon ang pag‑uswag sa peace and order situation sa CDO.
Dugang pa niya, ang mga datos sama niini gigamit aron masukod ang performance sa mga security forces ug mapalig‑on pa ang mga polisiya sa pagpanalipod sa katawhan.
Nasabtan usab sa kapulisan nga dako ang papel sa pagbati sa publiko sa mga survey kalabot sa safety, busa padayon sila sa pagpaayo sa serbisyo aron mas mabati sa mga residente ang ilang presensya ug proteksyon.
Sa karon, gipahimangno sa PRO‑10 nga padayon ang ilang pag‑enhance sa mga lakang sa seguridad aron mas mapataas pa ang pagsalig sa katawhan ug mapalig‑on ang kaluwasan sa dakbayan.
