CAGAYAN DE ORO CITY-Bisan ang sakop sa media ang wala palabya sa grupong Kabus Padatu-on o KAPA ni Joel Apolinario nga kumbinsihon aron mahimong miembro diin pangayua’g donasyon dinhi sa rehiyon.
Kini human gibulgar sa radio anchorman Cocoy Medina sa dxIF-Radyo Pilipinas nga bisan siya ang gidani sa taga-KAPA aron mahimong miembro sa Valencia City, Bukidnon.
Miingon si Medina nga gawas sa Bukidnon, nakaabot na sa Misamis Oriental ang maong grupo partikular sa lungsod sa Manticao.
Tungod niini ipalig-on pa sa Security and Exchange Commission o SEC ang ilang information drive batok sa investment scams diin unang biktima ang mga kabus ug pipila ka propesyonal sa nasud.
Kini ang pag-uyon ni SEC Commissioner Atty Javey Paul Francisco sa sugyot nga angay ipakusog ang ilang koordinasyon sa DILG ug Local Government Units o LGUs aron paspas masayod ang publiko sa mga pahimangno niini.
Gihimo ni Francisco ang pahayag alayon sa gihimo nila nga nationwide seminar batok online scams sa Capitol University o CU ning syudad.
