CAGAYAN DE ORO CITY – Imbestigaran sa mga komitiba sa police,fire and public safety ug brgy affairs ang pasangil nga nakaligis sa empleyado sa brgy ang sakyanan sa amahan ni Kag Lordan Suan sa Brgy Tuburan ning syudad.
Kini human mohimo’g special report si SK Federation President John Michael Seno kabahin sa giingong pagpasagad sa pamilya Suan sa panginahanglang medikal sa biktima nga si Beltran Nangcas,53 anyos,minyo nga nagpuyo sa lugar.
Sa report ni Seno,gisaysay niini igo lang mihatag sa usa ka libo ka pesos ang private secretary ni Suan ug wala na dayon motagad pa sa ubang panginahanglanon sa biktima.
Nasuta nga si Nangcas,amahan sa usa sa mga staff ni Seno apan ning bulana lamang gihimu-ag special report sukad nahitabo ang bangga sa motorsiklo ug SUV sa miaging Enero ning tuiga.
Samtang gihimakak ni Suan ang akusasyon ni Seno nga gipasagdan sa iyang pamilya ang kahimtang sa miembro sa Lupong Tagapamayapa nga si Beltran Nangcas tungod sa nahitabo kaniya.
Gibutyag ni Suan nga wala makaabot kaniya ang maong hitabo ug mismo sa special report na lamang ni Seno niya nasayran kagahapong adlawa.
Samtang gi-kuwestiyon sa konsehal ang motibo ni Seno kon nganong mismo pa sa kampanya sa piliay gidala niini sa atensyon sa konseho nga unta mahimo ra man unta kining matuki sa mismong bulan pa sa Enero.
Samtang gi-kuwestiyon ni Kag Zaldy Ocon ang legal nga basehan ni Seno kabahin sa vehicular accident nga gilambigitan sa sakyanan sa amahan ni Suan ug Nangcas.
Apan gilayong gisita ni Kag Ian Mark Nacaya ang taras ni Ocon ilabina ang pagpangutana niini sa kabanay sa biktima nga dili kabahin sa hisgutanan sa maong special report.
Apan gisumbalikan kini’g kuwestiyon ni Ocon si Nacaya ug giignan nga maghilom kay wala pa kini mahuman sa iyang mga pangutana.
Bisan si City Vice Mayor Rainer ‘Kikang’ Uy ang wala palabya sa batikos ni Ocon kay gilalisan nila ang mga gabayan sa konseho gumikan sa maong isyu.
Samtang gisaway sa abogado nga si Kag Edgar Cabanlas ang dili maayong kinaiya ni Ocon nga naghatag sa dakong kaulawon atubangan sa katawhan sa dakbayan.
Miingon si Cabanlas nga diriyot na niya ipa-adjourn ang ilang regular session tungod sa panaglalis sa iyang mga kauban.
Gipadumduman sa konsehal si Ocon nga mas motigbabaw ang ilang mga patakaran nga gipatuman sa sulod sa konseho kay sa kagustuhan niini nga tinubdan sa panaglantugi nila sa sesyon kagahahapon sa hapon.
