CAGAYAN DE ORO CITY – Miani sa lain-laing reaksyon ang baruganan ni City Councilor Jocelyn Rodriguez nga mahatagan prioridad ang usbaw sa ilang mga suhulan isip govt officials ning syudad.
Kini human kabahin ang elected officials nga gihangyo ni City Mayor Oscar Moreno nga sila umentuhan sa ilang mga suweldo kuyog sa frontliners nga nakig-away batok sa coronavirus disease sa syudad.
Miingon si Rodriguez nga unta magbaton sa delicadeza sila nga public officials nga naglakip kang Moreno ug maoy unahon pagtabang ang katawhan nga nag-antos sa kapit-os dala sa krisis sa bayrus.
Samtang gitugtan sa Dept of Budget and Management o DBM circular ang gipangayo ni Moreno ug ubang city govt workers alang sa umento sa suhulan ug benepisyon ning tuiga.
Kini ang pagdepensa ni City Vice Mayor Rainer Joaquine Uy kon nganong gitugtan nila ang hangyo sa mayor.
Miingon si Uy nga nag-una nga hangyo ni Moreno kanila ang pag-uyon nga hatagan sa dugang suhulan ang frontliners nga mibuhis sa mga kinabuhi aron lamang batukan ang coronavirus sa dakbayan.
Namugos si Uy nga walay bisan gamay nga ilegal sa maong transaksyon kay tanang local govt units ang gitugtan niini sa gobierno.
Samtang walay basehan ang pasangil nga naniguro lamang si Moreno sa iyang kaugalingong usbaw sa suhulan ug benepisyo bisan nag-antos sa kalisod ang katawhan sa dakbayan.
Kini ang tubag sa mayor batok sa mga pasangil nila ni kanhi city councilor Dr Bob Ocio ug Macasandig Brgy Kag Nixon Baban nga nag-trending sa social media.
Miingon si Moreno nga dili na lamang niya tumpangan ang duruha kinsa tinuyo nga nagsaba-saba tungod sa ilang politikanhong plano sa tuig 2022.
