Nanawagan si City Councilor Enrico Salcedo sa dugang transparency gikan sa Cagayan Electric Power & Light Co., Inc. (CEPALCO) kalabot sa padayon nga pagsaka sa tingil sa kuryente sa Cagayan de Oro.
Sa iyang special report sa regular session sa konseho niadtong Lunes, gipadayag niya nga nagsugod ang pagtaas sa Abril ug kulang pa ang klarong pasabot sa mga konsumidor.
Matod niya, adunay mga kaso nga bisan ubos ang nakonsumo nga kilowatt-hour (kWh), mas taas gihapon ang nabayran nga bill kumpara sa miaging bulan.
Tungod niini, gihangyo niya ang pagdungog sa CEPALCO ubos sa Committee on Public Utilities aron ipasabot ang hinungdan sa pagtaas sa tingil.
Gipahinumdoman usab niya nga kinahanglan sundon ang regulatory requirements sa Energy Regulatory Commission sama sa public notice ug hearing sa dili pa ipatuman ang bisan unsang adjustment.
