Napalgan ang usa ka Fraser’s Dolphin nga napadpad sa baybayon sa Purok 3, San Vicente, Barangay Casinglot, Tagoloan, Misamis Oriental. Sumala sa Tagoloan Information Office, ang dolphin unang nakita nga nagluya ug wala na’y kusog sa paglangoy, ayha kini nabugtuan sa kinabuhi. Ang Fraser’s Dolphin, nailhan usab nga Sarawak dolphin, kasagarang nagpuyo sa lawom nga tubig sa Pacific Ocean ug dili kasagaran makita sa baybayon. Ang maong insidente nagdani sa interes sa mga lokal nga residente ug environmental groups nga nagtan-aw sa kahimtang sa marine biodiversity sa rehiyon.
Ang Fraser’s Dolphin (Lagenodelphis hosei) usa ka klase sa isda nga adunay stocky nga lawas, gamay nga fins, ug walay prominenteng beak, nga nagpalahi niini sa ubang species. Kini motubo hangtod 2.75 metros ang gitas-on ug moabot sa 200 kilos ang kabug-aton sa pagkahamtong. Kasagarang makita kini sa dagkong grupo nga naglangoy og paspas sa lawom nga tubig, ug naggamit og echolocation aron mangita og pagkaon sama sa squid, shrimp, ug pelagic fish. Bisan pa nga dili kini endangered, ang Fraser’s Dolphin giapil sa CITES Appendix II aron maprotektahan batok sa sobrang pagpangisda ug polusyon sa dagat.
Nanawagan ang mga opisyal sa Barangay Casinglot nga dili pokoton o samokon ang mga dolphin nga mapadpad sa baybayon, ug pasagdan lang kini nga makabalik sa dagat kung buhi pa. Ang maong panawagan kabahin sa kampanya sa barangay alang sa marine conservation ug edukasyon sa komunidad. Ang lokal nga LGU nagplano sa pag-coordinate sa BFAR ug DENR aron masusi ang hinungdan sa pagkapadpad sa dolphin ug pagpatuman og mas lig-on nga proteksyon sa baybayon. Gidasig usab ang mga residente nga motaho dayon sa mga otoridad kung adunay makita nga marine animals nga nanginahanglan sa tabang.
