CAGAYAN DE ORO CITY – Giawhag ni DSWD Undersecretary Luzviminda Ilagan ang mga mga tawo nga adunay reklamo sa distribusyon sa Social Amelioration Program o SAP nga modangop sa ilang buhatan o sa Department of Interior and Local Government.
Siya miingon nga kinahanglang mapaabot sa mga hingtungdang ahensya ang mga reklamo aron maaksyonan ilabina kadtong wala makadawat sa ayuda.
Gibutyag ni Ilagan nga mahimo usab i-report sa ilang hotline ang mga nakadawat sa SAP nga maayo ang kahimtang sa panginabuhian aron manubag sa balaod.
Samtang gitin-aw ni Ilagan nga responsibilidad sa brgy official ang pagseguro sa kaluwasan sa SAP beneficiaries sa pag-claim sa ilang cash assistance.
Miingon si Ilagan nga kinahanglang mangita’g paagi ang kapitanes nga mapatuman ang physical distancing sa mga mokuha sa ayuda aron makalikay sa Covid-19.
Hisayran nga miani’g pagsaway ang ikaduhang hugna sa SAP distribution sa pipila ka brgy sa syudad gumikan sa pagdasok sa daghang tawo.
