CAGAYAN DE ORO CITY – Giklaro ni Northern Mindanao Medical Center o NMMC hospital director Dr Jose Chan nga wala namatay nga positibo sa coronavirus disease o COVID-19 ang pasyente nga gitratar nga Severe Acute Respiratory Illness o SARI ning syudad.
Kini human nadugangan ang ihap sa SARI patients nga nakalas samtang gihulat ang confirmatory test result sa ilang panglawas kagahapong adlawa.
Gihimo ni Chan ang katin-awan aron ihupay ang kabalaka sa publiko sa sunod-sunod nga kamatayon sa SARI patients diin pinakaulahi ang gikan sa Brgy Canitoan ning syudad.
Dugtong niini, anaa na lamang sa pito ka persons under investigation o PUIs; duha ka SARI patients ug duha ka Covid-19 positive patients nga taga Del Carmen, Iligan City ug Tubod, Lanao del Norte ang padayon nga gitambalan sulod sa ospital.
Una nang nakaggawas sa NMMC human nag-negatibo an sa Covid-19 ang 71-anyos nga taga-Cagayan de Oro sa miaging adlaw.
Samtang gitin-aw ni Department of Health o DOH-Northern Mindanao Infectious Diseases Cluster Head Dr. Ian Gonzales nga sayo pa aron i-deklara nga luwas na sa bahad sa coronavirus disease ang syudad.
Kini taliwala nga wala nay nadugang nga ihap sa mga nagpositibo sa maong virus sa miaging mga adlaw.Gihimo ni Gonzales ang komento nunot sa pagkauli-i sa 71 anyos nga pasyente nga unang positibo sa coroanvirus diha sa NMMC.
Nagpahimangno si Gonzales sa publiko nga magbinantayon ug ampingan ang kaugalingon tungod kay padayon ang pagsaka sa ihap sa persons under monitoring ug persons under investigations sa ubang rehiyon.
