Nanawagan si Datu Tokz Bin Abdurrahman,gikan sa grupong Save Bangsamoro Movement, ngadto sa Korte Suprema nga daling ipagawas ang desisyon niini kalabot sa mga nakabinbing petisyon sa dili pa mahitabo ang umaabot nga piniliay sa Bangsamoro Parliament.
Gipunto ni Datu Tokz nga adunay mga reklamo kalabot sa Bangsamoro Autonomy Act 86 tungod kay gituohan gihapon kini nga adunay elemento sa “gerrymandering” o ang kwestyonableng pag-usab sa mga distrito aron makontrolar ang mga botante.
Gihimug-atan sa maong opisyal nga hinungdanon kini nga resolusyon aron maseguro nga mahimong katuohan ug walay kwestyon ang resulta sa eleksyon ug malikayan ang dugang mga kaso sa korte human sa botasyon.
Gawas niini, gipadayag usab ni Datu Tokz nga lakip sa mga gikuwestiyon sa mga hingtungdan ang pipila ka bahin sa giusab nga electoral code sa maong rehiyon.
Tungod niini, gilauman sa ilang grupo nga mahatagan na og katin-awan ang maong mga isyu aron mapabilin ang integridad sa demokratikong proseso sa BARMM.
