Mipadayag si Matthew Silverio sa Student Council Alliance of the Philippines (SCAP) nga dako ang papel sa kabatan-onan sa pagsabot ug pagbatok sa mga isyu sa korapsyon sa nasud, ilabi na karon nga nagpadayon ang mga kontrobersiya nga naglambigit sa dagkong opisyal sa gobyerno.
Matod pa ni Silverio, uban sa ilang koalisyon nga Youth Against Corruption, ilang gipanawagan sa tibuok nasud nga kinahanglan tutokan ang pagpanubag sa mga tiwali nga opisyal pinaagi sa impeachment ug imbestigasyon sa mga alegasyon sa pag-abuso sa pondo publiko.
Gipamugos usab ni Silverio nga kinahanglan magpadayon ang pagbantay sa kabatan-onan sa mga impeachment proceedings ug sa mga lakang sa gobyerno aron masiguro nga walay kaso sa korapsyon nga magpabilin nga wala matubag.
Tungod niini, gi-awhag sa SCAP ang mga estudyante ug kabatan-onan nga magpabilin nga aktibo, mamalandong sa mga panghitabo sa nasud, ug magpadayon sa pakigbatok batok sa bisan unsang porma sa korapsyon.
