CAGAYAN DE ORO CITY – Gikakurat ni Xavier University College of Law Professor Atty. Oscar Moreno ang nakab-ot nga hukom sa mga mahistrado sa korte suprema sa giatubang nga impeachment case ni Vice Pres Sara Duterte sa senado.
Kini tungod kay 13 ang mipaabor sa hangyo ni Duterte nga wad-an sa bili ang maong kaso kay dayag nalapas ang ONE YEAR BAN rule sa pagduso sa impeachment batok kaniya.
Miingon si Moreno nga talagsaon ang gipakanaug nga hukom sa korte suprema ug dili basta-basta nga mabali kung walay lig-ong mga ebedensiya ang kamarabaha sa oras nga sila moduso pa sa motion for reconsideration.
Samtang dili pa luwas si Sara kabahin sa iyang giatubang nga articles of impeachment nga giatubang.
Kini bisan kung gipaboran sa mga mahistrado sa korte suprema ang iyang petisyon nga nagkuwestiyon sa legalidad sa gihimo sa kamarabaha nga pagkaso kaniya.
Miingon si IBP-Misamis Oriental chapter president Atty. Greg Pallugna nga ang proseso lang ang gideklara nga UNCONSTITUTIONAL sa korte suprema apan wala mohilabot sa articles of impeachment.
Nagkahulugan kini nga igo paghuman sa usa ka tuig,mahimong subli nga iduso ang maong mga pasangil batok kang VP Sara sa kongreso.
Sa panig usab sa beterano nga si Atty Proculo Sarmen nga angayang tahuron sa pro-impeachment groups nga gilakipan sa mga magbabalaod sa kamarabaha ug senado ang hukom sa korte suprema.
Kini aron kalikayan nga adunay panagbangga sa korte suprema ug kongreso sa higayon nga dili nila tahuron ang hukom sa petisyon ni Sara nga nag-resulta sa pagka-deklara nga UNCONSTITUTIONAL rason nga wala na’y angay himoon nga court proceedings ang senado.
Miingon si Sarmen sa interbyu sa Bombo Radyo nga hayan molihok ang militar kung adunay mahitabo nga constitutional crisis epekto sa pagdumili sa kongreso nga ilhon ang hukom sa mga mahistrado sa taas nga hukmanan.
