CAGAYAN DE ORO CITY – Gikalipay sa Security and Exchange Commission o SEC nga subli gibarugan ni Pres Rodrigo Duterte ang pagpahunong sa kalihukan sa Kabus Padatoon o KAPA Community Ministry International Incorporated.
Kini tungod sa daghang kasupakan sa balaod nga nahimo sa KAPA sa pagpadagan sa ilang grupo diin nalambigit sa pagpangayo’g donasyon apan gigamit sa mga negosyo nga walay pagtugot sa gobierno.
Miingon si SEC regional director Atty Reynato Egypto nga pagmatood lamang kini nga wala masayop ang gihimo nila nga hukom aron sumpuon ang padayong ilegal nga kalihukan sa KAPA dinhi sa nasud.
Samtang gi-finalize na sa National Bureau of Investigation o NBI-Manila ang mga dokumento nga magamit pagkaso’g kriminal batok grupo ni KAPA founder Joel Apolinario.
Kini human unang nabawi sa NBI ug SEC ang mga dokumento diin nagtumbok sa ilegal nga kalihukan sa KAPA.
Miingon si Egypto nga kabahin ang ilang opisina nga magsilbing complaint batok KAPA pag-abot sa korte.
Dugtong usab niini,gipanganti ni NBI 10 Regional Director Atty. Pipo Bernales nga daghang mga kaso ang atubangon sa mga opisyal sa KAPA.
Kini human ilang nakita base sa pagpadayon sa inventory sa mga ebedidensya nga nakuha sa raid sa Igpit Opol, may mga dagko nga kantidad ang na invest sa maong organisasyon.
Gibutyag ni Bernales nga ilang gisuta kung asa napadulong ang dakong kantidad nga gi invest sa KAPA.
Gihulagway ni Bernales nga dili tiaw ang maong investment.
