Giingong angay lamang ihatag ang second chance kung tinuoray nga andam ang usa ka tawo nga muagi og mental health intervention, sumala ni Stella Ferrarez, RPM, usa ka iladong mental health advocate. Namahayag si Ferrarez sa Bombo Radyo nga bisan paman natural sa mga Pilipino nga muhatag og laing higayon sulod sa pamilya, dili kini angay ihatag kung walay klarong kabag-ohan og kahimtang sa pangisip sa nagbuhat og kadaut. Gipasabot niya nga kinahanglan mahimong kondisyon ang pagpatambal ni mister aron masiguro nga dili na mobalik ang pagpangabuso. Dugang pa ni Ferrarez nga ang pagduol sa mga propesyonal makatabang aron masabtan ang hinungdan sa dili maayong binuhatan ug unsay makatrigger niini. Matod pa niya ang saktong interbensyon maoy paagi para maputol ang cycle sa abuso ug maprotektahan ang pamilya.
Written by: James Oliver
