Aron putlon ang dugay nang kahilom ug kalisod sa komunikasyon sa mga kalabangan, gipakatap karon sa Cagayan de Oro City Police Office ang ilang mga opisyal sa lima ka dapit nga giilang Geographically Isolated and Disadvantaged Area kon GIDA.
Lakang kini sa kapulisan aron direktang madala ang seguridad ug saktong impormasyon sa mga barangay sa Tuburan, Besigan, Dansolihon, Taglima, ug Tagpangi.Gipasabot ni Police Major Emilita Simon, spokesperson sa kapulisan sa dakbayan, nga ang kakulang sa hustong pahibalo sa maong mga GIDA nga dapit ang nag-unang hinungdan sa panagbangi tali sa mga residente ug sa gobyerno.
Tungod niini, gipakatap dayon ang mga pulis pinaagi sa programa nga Revitalized Pulis sa Barangay aron masiguro nga adlaw-adlaw nga maabot ang serbisyo ug mapanalipdan ang mga pamilya sa kalabangan.
Gipasalig usab sa kapulisan nga dali na nilang maadtoan karon ang maong mga barangay aron paspas nga matubag ang bisan unsang krimen ug krisis.
