CAGAYAN DE ORO CITY-Mihugot na ang seguridad sa ganghaan hangtod pasaka sa bukid sa Malasag sa Brgy Cugman ning syudad.

Kini human gisugdan na sa kapolisan ang pag-rekisa sa tanang mga deboto nga tuyo mohimo’g estasyon sa 14 ka krus sa maong holy site ning syudad.

Miingon si Cugman Police Station commander C/Insp Ian Borinaga nga wala na’y tugtan nga ipasaka nga mga pribadong salakyan gawas lamang sa mga de marka nga mga behikulo.

Sa pagkakaron, anaa na sa libuang deboto ang nakasaka sa maong bukid.

Samtang gidid-an na usab sa kapolisan ug force multipliers ang mga deboto nga makasulod sa bisinidad sa Berhin sa Guadalupe nga nagbaton sa mga kontrabando.

Kini sa tuyo nga dili pangdakpon ang mga deboto ilabina kon sila magdala’g armas, droga ug hait nga mga kabtangan.

Miingon si Puerto Police Station commander C/Insp Evan Vinias nga pamatood niini nga bisan ang mga perfume ug alcohol ang gipangkuha dihang nasita pagsulod sa entrance sa maong lugar.

Natala na usab ang libu-libong deboto nga nakatabok na sa 12 ka suba ayha makaabot sa kapilya sa Berhin sa Guadalupe nga nalibutan sa Barangay Tablon, Agusan ug Balubal ning syudad.