Mapasalamaton si City Councilor Roger Abaday sa tanang mikooperar ug mituman sa mga abiso sa otoridad atol sa malampusong pagsaulog sa Feast of the Black Nazarene ning syudad. Giingon ni Abaday nga padayon ang pag monitor sa komites sa Police, Fire and Public Safety sa pagmentinar sa kahusay ug kalinaw sa dakbayan bisan pa nga natapos na ang dakong kalihokan. Wala matod pa mahunong ang pagmonitor sa mga otoridad tungod kay kabahin na kini sa naandan nga rutina sa kapulisan ug kasundalohan sa pagpanalipod sa publiko. Espesyal nga gipasalamatan sa konsehal ang tanan mga uniformed personnel ug nagkadaiyang buhatan nga mitabang sa pagpahugot sa siguridad atol sa Traslacion 2026.
