Dili gayud pwedeng mabiyaan ang sektor sa agrikultura sa paglambo ug paggamit sa modernong teknolohiya bisan pa man sa paspas nga pagka-urbanisado sa dakbayan sa Cagayan de Oro.
Mao kini ang gipahayag ni Agricultural Productivity Operations Office Acting Department Manager Engr. Bernie A. Daba Jr. atol sa gipahigayon nga turnover sa nagkadaiyang kagamitan sa panag-uma ug panagdagat.
Aron masabayan ang maong pagsaka sa teknolohiya, gipanghatag sa lokal nga pamahalaan ang mga solar-powered irrigation pump, irrigation accessories, organic fertilizer, pumpboat engine, ug mga fish aggregating devices sa tanang coastal barangay gikan sa Bugo hangtod sa Bulua.
Pinaagi sa maong lakang nga gidungan sa Fiesta sa Kaamuhan, gipakita sa dakbayan ang paghatag ug dakong bili sa panginabuhian sa mga mag-uuma ug mangingisda.
