CAGAYAN DE ORO CITY- Mag-atubang sa kasong murder ang sekyu nga mipusil-patay sa iyang kaubang guwardiya diha sa Sitio Tibasak,Barangay Macasandig sa syudad.
Giila ni PO3 Rey Bustamante,imbestigador sa Macasandig Police Station ang biktima nga si Mansueto Gayramon,57 anyos,nagpuyo sa Purok 3,Barangay Gusa sa syudad.
Maoy ilang kasuhan sa piskalya ang suspek nga si Marvin Maculintas nga taga- Barangay Nazareth sa syudad.
Una nagbaton sa igo sa ulo ang biktima gamit ang kalibre 38 nga armas hinungdan sa kamatayon niini.
Sa gihimong pagduki-duki sa Bombo Radyo,nakaangkon si Maculintas nga mismo siya ang mipatay kang Gayramon tungod sa iyang kasuko.
Kanunay nga biay-biayon sa biktima ang suspek sa pag-ingon nga wala kini training samtang nagsilbing guwardiya ubos sa Rover Eagle Security.
Una nang namahayag ang suspek nga namatay ang biktima kay gi-atake sa highblood apan wala motoo ang kapolisan niini.
Misigunda pa kini sa pag-ingon nga kabahin siya sa mipatay sa biktima pinaagi sa pagkablit sa armas kay giingong gihangyo siya aron mahunong na ang gihambing sulirang pinansyal niini.
