CAGAYAN DE ORO CITY – Mag-atubang kon dunay igong basewhan sa kasong homicide,frustrated homicide ug pagpanulis ang grupo sa gitoohang kanhi mga empleyado sa Mindanao Talakag Steel Corporation sa lungsod sa Villanueva,Misamis Oriental.
Kini human dako ang pagtoo sa kapolisan nga inside job ang pagpanulis nga mi-resulta sa pagpatay sa tulo ka armadong suspek sa sekyu nga si Celso Palma,58 anyos,minyo nga taga-Davao City ug pagkaangol sa kauban niini nga si Teodem Colonia,38 anyos nga pulos nagbantay sa maong patigayon.
Namahayag si Police Master Sargeant Celmer Dagonlay,imbestigador sa Villanueva Police Station nga unang milusob ang tulo ka naka-bonnet nga mga suspetsado diin gipusil nila si Palma ug Colonia.
Sa wala pa hingpit misibat ang mga suspek,gikawat usab nila ang balor 1.5 milyones pesos nga salapi ug mga alahas sulod sa vault.
Subay sa footages sa CCTV, nakit-an nga kadudahan ang mga lihok sa truck driver nga si Reynante Perez,50 anyos nga taga-Baungon,Bukidnon rason nga gitudlo sa kapolisan nga ka-konsabo sa mga nakasibat nga mga suspetsado kagahapon sa kadlawon.
Tungod niini,gi-konsidera kining person of interest samtang padayon ang imbestigasyon.
Apan kay nakuhaan man daw sa ilegal nga droga sama sa gitoohang shabu ang POI,kasuhan nila sa pagsupak sa Dangerous Drugs Act of 2002 kay giingong nakuhaan sa pipila ka sachets sa gitoohang shabu kagahapong adlawa.
