CAGAYAN DE ORO CITY – Gi-relib sa liderato sa Cagayan de Oro City Police Office o COCPO ang pipila ka station commanders nunot sa luya nga kampanya batok ilegal nga pasugal sa syudad.
Kini human nahimong init nga isyu ang pagpangdakop sa mga pulis sa tellers sa Small Town Lottery o STL ubos sa Diamond Millenium Corporation o MDC nga kasamtangang wala’y nahuptan nga authority to operate gikan sa PCSO.
Miingon si COCPO spokesperson Lt Col. Evan Viñas nga tipik sa gipangbalhin sila Carmen Police Station commander Maj Mario Mantala Jr;Cugman Police Station commander Maochin Zayas ug Puerto Police Station commander Capt Lowel Estampa.
Si Mantala gipahimutang na sa City Intelligence Unit ug mihulip kaniya ang iyang deputy nga si Capt Lorenzo Ocon.
Samtang si Zayas nga anaa sa Mobile Patrol Unit ang gipulihan usab ni Capt Macario Linog.
Nagsilbi na usab nga bag-ong comamnder sa Puerto Police Station si Maj Labitad Sabino samtang si Estampa anaa sa City Mobile Force Company o CMFC.
Una nang gibalhin usab si Maj Mike Cavan sa CMFC ug mihulip kaniya si Capt Amir Maruhom sa Agora Police Station.
