CAGAYAN DE ORO CITY-Gibutyag sa Citizens Watch for Good Governance o CWGG-10 nga wala mahatagi’g due process requirement si Sen Antonio Trillanes IV sa gihimong pagbawi sa iyang amnestiya ni Pres Rodrigo Duterte.
Matud ni CWGG convenor Atty Antonio Soriano nga maoy angayang buhaton ni Solicitor General Jose Calida ang pagpatawag ug pagpangayo’g katin-awan kang Trillanes kon nganong adunay kulang sa rekisitios sa iyang amnestiya.
Apan tungod kay pulitika ang motibo sa pagbawi sa amnesty ni Trillanes, gilayon nga nagpaggawas sa Proclamation 572 si Duterte.
Gisalig na lamang ni Soriano sa Korte Suprema ang pagdesisyon sa amnesty ni Trillanes.
Samtang nagbahad si Soriano nga posibleng mosamot kamahal ang presyo sa mga palaliton sunod tuig.
Kini kun ugaling dili mahatagan sa kasulbaran sa kasamtangang administrasyon ang padayong pagsaka sa inflation rate.
Asoy ni Soriano nga nakapasamoot sa inflation ang Build Build Build program sa gobyerno tungod sa raw materials nga gapaliton gawas sa nasud.
Dugtong niini, giawhag ni Soriano ang administrasyon nga pangitaan sa kasulbaran ang inflation ug dili pulos pulitika.
