Giangkon ni Senador Erwin Tulfo nga nasakitan siya sa nahimong boto sa tulo niya ka kaubang senador nga pabor sa petisyon nga nagtumong sa palagputon siya gikan sa iyang pwesto.
Gipagawas niya nang maong pahayag human gibasura sa Senate Electoral Tribunal (SET) ang mosyon aron huna-hunaon niini pag-usab ang una na niining desisyon nga ibasura ang quo warranto petition batok kang Tulfo mahitungod sa mga pasangil sa iyang citizenship ug uban pang mga basihan.
Sa subling paghisgut sa quo warranto petition batok sa senador kay unom ka miyembro sa SET ang nibotar aron balibaran ang maong mosyon, samtang tulo ang nibotar batok niini.
Matud ni Tulfo, gisalig na lamang niya sa Ginoo ang nahitabo, bisan pa man sa pag-angkon niini nga nasakitan siya tungod kay duha sa tulo ka senador kay duol kaniya, ilabi na matud pa nga makagakos, makalamano, ug halos magkatapad lamang ang ilang mga buhatan. (raniel mahunyag)
