CAGAYAN DE ORO CITY, Philippines – Gibarugan ni Senate President Francis ‘Chiz’ Escudero nga wala’y plano ang senado nga tandugon ang naka-han-ay nga ihap sa mga holidays sa Pilipinas.
Dumduman nga nabulit sa batikos ang bag-ong kalendaryo nga gipagawas sa Malankang nga nabulit sa daghang mga regular holidays.
Gitataw ni Escudero nga wala sa palisiya sa Senado ang pagdugang o pagkulang sa “standard holidays” nga ipagawas sa Office of the President”.
Una niini, padayong giduso si Albay Representative Joey Salceda ang iyang House Bill 5032.
Tumong sa sugyot nga limitahan ang adlaw sa mga holidays sa gobyerno kay usa sa maapektuhan niini ang private sector nga gapatuman sa “no work, no pay policy”.
Gawas niini, gusto sa magbabalaod nga mas mahimong competitive ang tanan ahensya sa gobyerno ug ipasaka pa ang kalidad sa serbisyo nga ilang matunol sa katawhan.
Nakalatid sa House Bill 5032 ang siyam ka regular non working holidays, 2 local non working holidays, 7 special non working days nga kinahanglan sabutan sa employee ug employer.
Buot ipasabot nga matag tuig, kinahanglan muabot lamang sa 18 ka regular ug special holidays nga ipatuman sa nasud, inay 25 hangtud 26 ka adlaw nga gipatuman sa Marcos Administration.
Gawas sa paghatag sa kalidad nga serbisyo, gusto ni Salceda nga makadaginot ang nasud sa pagsigeg hatag suhulan sa mga empleyado nga walay agi sulod sa pipila ka adlaw nga holidays.
