Gitugyan nila Atty. Manuelito De Los Reyes Luna, Jacinto Paras, ug Ferdinand Topacio ang ethics complaint batok kang Senadora Risa Hontiveros sa Office of the Senate Secretary General.
Ang reklamo naglakip sa alegasyon sama sa “witness tampering” o pagpanghilabot sa testimonya sa mga testigo sa mga imbestigasyon sa Senado.
Una niini, ang reklamo nagsunikad sa testimonya ni Michael Maurillo (alias Rene), nga miingon nga giimpluwensyahan siya ni Hontiveros aron mopasangil batok kang Pastor Apollo Quiboloy, Vice President Sara Duterte, ug kanhi Presidente Rodrigo Duterte.
Miingon si Maurillo nga gihatagan siya’g ₱1 milyon aron muhimakak sa Senate hearing.
Apan kini iyang gibakwi sa usa ka video nga gipost online.
Dugtong niini, lakip sa reklamo ang mga alegasyon nga sa 2017, si Hontiveros gikuhaan sa kustodiya ang tulo ka menor de edad nga testigo sa kaso ni Kian delos Santos, nga wala ipahibalo sa ilang ginikanan o sa DSWD.
Subay sa imbestigasyon sa Pharmally, adunay testigo nga giingnan sa assistant ni Hontiveros nga hatagan kwarta (suhol) aron mupanghimakak.
Karong hapon, gitubag ni Hontiveros ang mga alegasyon nga mga “recycled lies” ug alang kaniya tataw nga harassment.
Miingon siya nga andam siyang atubangon ang kaso ug adunay ebidensya nga mopamatood nga bakak ang mga pasangil.
Gitin-aw sa Senador nga wala siya mabalaka tungod kay daghan pa sila’g trabaho sa Senado ug dili siya magpadala sa mga “drama” nga sama niini.
Hisayran nga lakip sa gibasehan sa ethics complaint ang Article VI, Section 16 (3) sa 1987 Constitution, nga nagtugot sa Senado sa pag-imbestigar ug pagdisiplina sa mga miyembro nga makasala sa “disorderly behavior”.
