Gisugyot ni Senador Raffy Tulfo nga ipataas sa dili moubos sa 1 milyon pesos ang insurance coverage alang sa matag indibidwal nga namatay sa aksidente sa barko tungod matud pa kay dili igo ang kasamtangang kantidad sa bayad.
Gipadayag sa representante sa Atienza Interisland Ferries Incorporated atol sa pagdungog sa Senado nga naapod-apod na ang unang bayad nga P50,000 sa matag pamilya sa mga namatay, samtang nakadepende pa sa beripikasyon sa insurance company ang pagpagawas sa nahibiling P200,000.
Dugang niini, P50,000 usab ang tabang-pinansyal nga gihatag sa matag indibidwal nga nakaluwas, samtang bulag nga tubagon ang ilang mga galastuhon sa balay-tambalanan ug tambal.
Gibutyag usab sa Maritime Industry Authority (MARINA) nga nakig-alayon na sila sa Insurance Commission aron patas-an ang insurance coverage ngadto sa P400,000 gikan sa kasamtangang kantidad niini ug matud pa, una na nilang gisugyot ang P500,000.
Bisan pa niana, gipamugos ni Tulfo nga bisan ang P500,000 kay dili igo maong gusto niyang ipatawag ang Insurance Commission sa mga mosunod nga pagdungog aron tukion ang pagpasaka sa insurance coverage alang sa mga namatay ug nakaluwas sa mga aksidente sa barko. (raniel mahunyag)
