Nagpahayag og kabalaka si Atty. Adonis Gumahad sa Gumahad Law Firm mahitungod sa paglisod sa Senate Impeachment Court sa pag-desisyon kung abrihan ba ang mga dokumento sa buhis ni Vice President Sara Duterte nga anaa sulod sa BIR box.
Subay sa gipasabot ni Atty. Gumahad, ang maong mga rekord nasakop sa National Internal Revenue Code o NIRC, busa kinahanglan gayud sundon ang tukmang lagda sa maong balaod sa dili pa kini mahimong publiko.
Basi sa iyang obserbasyon, daw wala nasubay sa Committee on Justice sa House of Representatives ang hustong pamaagi sa NIRC sa dihang ilang gipasa ang mga dokumento ngadto sa korte nga nakaselyo pa.
Ingon man, nagpabiling alanganin ang korte sa pagpadayon sa maong lakang gawas kung balik-balikan ang saktong legal nga pamaagi nga gilatid sa balaod aron magamit kini sa pag-depensa sa Bise Presidente.
