Wala magkinahanglan ang senado sa basbas ni Presidente Ferdinand Marcos Jr aron mapaniguro nga mulahutay ang pagbukas sa impeachment proceedings sa sunod semana.
Sa exclusive interview sa Bombo Radyo, namugos si Senate Minority Leader Koko Pimental nga managsama ra ang posisyon nila Vise President Sara Duterte ug Presidente Marcos isip impeacheable official.
Busa wala kini papel sa ilang ilusad nga hearing.
Usa si Pimentel sa misupak sa laraw nga summary dismissal sa kaso ni Duterte.
Siya miingon nga subay sa konstitusyon, obligasyon sa senado nga ipadayon ang pagdungog dili kini puwedeng i-dismiss nga wala mi-agi sa hustong proseso.
Gihingusgan sa outgoing senator nga interes sa katawhan ang ilang gibarugan ug dili politikahong interes sa pipila nga gustong ibasura ang impeachment.
Una nang gipamugos ni Senator JV Ejercito nga kinahanglan muligid na ang impeachment trial kay daku kini nga oportunidad alang sa bise presidente nga madungog ug matubag ang mga akusasyon batok kaniya.
Mipasabot si Ejercito nga ang senado adunay constitutional duty nga pagpadayon sa pagdungog ug dili kini basta-basta nga makadismiss sa bug-at nga mga kaso.
Uyon usab si Ejercito sa pamahayag ni Senador Pimentel nga ang katawhan adunay katungod nga makita ang presentasyon sa ebidensya gikan sa House Prosecution Panel ug kung nganong milanding sa impeachment ang gi-atubang nga kaso sa bise presidente.
