Gipahibalo sa buhatan ni Senator Robin Padilla nga andam nga ipailalom sa imbestigasyon ang senador taliwala sa mga pasangil bahin sa pagtago kuno kay Senator Bato dela Rosa.
Sumala pa ni Samira Gutoc gikan sa buhatan ni Padilla, walay gihuptang arrest warrant o dokumento gikan sa International Criminal Court nga nagpamatuod nga wanted si dela Rosa o adunay nahitabong pagbabag sa hustisya.
Gitin-aw usab sa buhatan nga walay legal nga babag ang mga lihok sa senador tungod kay gi-gamit ra niini ang katungod sa kagawasan ilawom sa Batakang Balaod.
Gituldokan usab sa kampo nga subay sa talaan sa mga kalihokan sukad Mayo 9 hangtod Mayo 11, nakita sa publiko ug sa mga awtoridad ang matag lihok sa senador busa walay angay nga tagoan o ikaduda sa Senador.
