CAGAYAN DE ORO CITY-Patay ang senior citizen human maghikog tungod sa pagmahay sa iyang kapikas diha sa Zone 1,Lower Bulua ning syudad kagahapon sa hapon.
Giila ang biktima nga si Espino Micalbio,68 anyos,minyo ug lumad nga taga-Initao,Misamis Oriental.
Migamit sa pisi ang biktima ug gihikot sa punuan sa mangga pipila ka metros gikan sa ilang balay.
Namahayag ang kapikas niini nga si Purita nga una na kining misulay paghikog ang biktima kaniadto kay kanunay niya badlungon tungod sa bisyo sa pag-inom.
Giluwas pa ang biktima apan gideklarar kining dead on arrival sa Northern Mindanao Medical Center.
Dumduman usab nga laing duha ka lalaki ang nagsulay gihapo’g hikog sa magkalahing lugar sa syudad ug Bukidnon kagahapong adlawa.
Samtang nagtoo ang psychiatric nurse head nga si Julie Maisog sa House of Hope Foundation nga pamilya ang unang maka-determinar kon ang usa sa mga sakop niini nagbaton sa stress o depresyon.
Miingon si Maisog nga may tahas ang matag-usa sa pamilya nga bantayan ang mga nagbaton sa maong suliran.
Siya miingon nga dako ang matabang sa kanunay nga paghinabi ug pagpaminaw sa usa ka higala tali na sa mga indibidwal nga naghambin sa sinyales sa depresyon.
Mi-abiso si Maisog sa publiko nga ipahiling gilayon ang miembro sa pamilya nga makonsiderar nga “emotionally stress o depress” pinaagi sa pagbisita sa mga klinika sa mga psychologist.
Sa pikas bahin,gibasol sa pipila ka opisyal sa simbahan ang internet ug social media kon nganong nahimong bayolente ang lihok mga batan-unan sa kasamtangang panahon.
Miingon si Msgr Perseus Cabunoc,rector sa San Agustin Cathedral nga ikatandi sa nahitabong gubat sa tunga-tungang sidlakan ug Amerika nga epekto sa mabaw nga pagsabot sa pakig-relasyon sa isig ka tawo.
Siya miangkon nga dunay mga tawong maghikog kay nagtoo sila nga wala na sila’y bili sa kalibutan.
Dugang sa pari nga ang mga batan-on ang nahimong adik sa social media ug wala’y tsansa nga ikauban ang pamilya.
