CAGAYAN DE ORO CITY – Nagtoo ang pamilya sa senior citizen nga giatake kini sa iyang sakit samtang naligo sa dagat diha sa may Purok 1, Luz Banzon Jasaan,Misamis Oriental.
Kini ang rason kon nganong nalumos-patay sa taga-tuhod nga tubig ang biktima nga si Roberto Romo, 74-anyos, taga Hinaplanon Claveria Misamis Oriental.
Gibutyag ni Chief Master Sgt Paul Salcedo, imbestigador sa Jasaan Police Station nga naligo ang biktima kauban ang iyang pamilya ug kalit lamang kini nga milugdang.
Hisayran nga nakita pa sa iyang pamilya si Romo nga nalingaw sa paglangoy-langoy sa dagat.
