CAGAYAN DE ORO CITY – Gipamugos ni Opol Mayor Max Seno nga walay gahom ang bisan kinsa nga local govt unit nga magpugong sa operasyon sa Grand Imperial Casino sa Brgy Taboc sa maong lungsod ning lalawigan.
Kini ang baruganan ni Seno sa iyang pag-atubang sa committee of the whole investigation nga gihimo sa Sangguniang Panlalawigan kon nganong nag-operate ang casino nga walay pagtugot sa brgy ug probinsya.
Miingon si Seno nga klaro sa hukom sa korte suprema nga giila niini ang balaod sa katukuran sa PAGCOR itandi sa mga ordinasa kontra casino nga gipasaka kaniadto ni kanhi City Mayor Pablo ‘Ambing’ Magtajas ning syudad sa dekada 90.
Kini ang rason nga gilugwaan niya sa letter of no objection o RONO ang pagsulod sa casino sa ilang lungsod.
Samtang gipamugos usab ni kanhi Opol mayor ug karon 2nd District Board Member Dexter Yasay nga may katungod ang local govt unit nga mopugong sa operasyon sa PAGCOR franchised-casino nga nag-operate sa ilang lungsod.
Kini ang pagpangungat ni Yasay sa baruganan ni Seno nga walay katungod ang bisan kinsa nga LGUs aron babagan ang operasyon sa PACGOR nga dunay igong gahom ug ubos sa opisina sa presidente.
Namugos si Yasay nga bisan kon legal ang katukuran sa PAGCOR apan dili mahimo nga baliwalaon ang papel sa usa ka lungsod o brgy.
