Gipahibalo ni PRO-10 Spokesperson PMAJ Joan Navarro nga gipailalom na sa inquest proceeding alang sa kasong frustrated murder ang duha ka pulis nga gitumbok nga nakapusil sa usa ka katrentay otso anyos nga lalaki sa Sitio Lumboy, Barangay Indahag, Cagayan de Oro City.
Pinasikad sa gihimong imbestigasyon, nagsugod ang gubot sa usa ka peryahan niadtong gabiing bahin sa Septyembre 21 dihang nakasag-id ang nahubog nga biktima sa maong mga sakop sa kapulisan hangtod nga napusilan kini sa iyang paa.
Dugang pa niini, mag-atubang usab og motu proprio nga imbestigasyon gikan sa Internal Affairs Service o IAS ang maong mga opisyal tungod sa paggamit og armas ug sa ilang pagtakas imbes nga tabangan ug dad-on sa ospital ang biktima.
Gumikan niini, gisiguro sa kapulisan nga dili gayud palapson o kunsintihon sa ilang organisasyon ang bisan unsang kalapasan sa balaod nga gihimo sa ilang kaubanan.
