CAGAYAN DE ORO CITY – Miani sa kusganong pagsupak ang lakang ni Kag. Alam Lim nga pag-usab sa unod sa iyang unang mosyon nga nagtumong sa pagpa-diskuwalipikar pagka-ABC president ug pagsilbing ex-officio member ni Kag. Marlo Tabac sa 21st city council ning syudad.
Kini human gitumong na lang ni Lim sa pag-defer sa pagsilbing ex-officio member ni Tabac ang iyang gihingusgan nga mosyon nga pasado na sa miagi pa nga sesyon sa konseho.
Miingon si Lim nga tungod sa gilugwa nga hukom sa ABC-Liga Regional sa iyang reklamo batok Tabac,nahukman niini nga wad-on ang pulong disqualification sa minutes sa maong sesyon.
Nalatid daw mando sa regional liga nga dili pa maka-asyumar si Tabac pagka-presidente sa liga-lokal apan sa pagka-bise presidente lamang gihapon tungod sa giimbestigaran nga isyu sa kurapsyonn niini.
Sa panig sa minoriya,naghatag sa dautang mensahe ang gihimo nga pag-uyon sa konseho nga simple nga ipausab ang unod sa milabay’ng sesyon gumikan lang sa kagustuhan sa mga sakop sa mayoriya sa konseho ning syudad.
Kini maoy reaksyon ni Kag. Aga Suan,minority leader kabahin sa lakang ni Lim nga mipasamot pagpalangan sa hingpit nga pag-function ni Tabac.
Miingon si Suan nga dili maayu ang epekto niini kay kung basta-basta lang makahimo’g kausaban ang mayoriya kung mohatag kanila sa dili komportabli nga kahimtang kanhi nauyunan nga isyu.
Tungod niini,anaa sa 13 ka konsehal ang miuyon sa lakang ni Lim ug tulo lang ang supak.
Dugtong niini,walay angay ikabalaka sa gi-adaptar nga pag-amendar sa unod sa mosyon ni Lim kabahin sa kasamtangang kahimtang ni Tabac sulod sa konseho.
Kini tungod kay pulong disqualification lamang ang gi-ilisdan apan anaa ang katibuk-an nga unod sa miaging sesyon.Gibutyag ni Kag. Edgar Cabanlas,lider sa mayoriya sa konseho nga ensakto ang gihimo ni Lim ug walay nasupak niini nga balaod.
Dumduman nga namugos si Alam nga pabiling dili angay ilhon sa konseho si Tabac tungod sa isyu sa kurapsyon nga giatubang diin nakasang-at sa Ombudsman ug blue ribbon committee sa konseho.
