CAGAYAN DE ORO CITY – Gibasura pinaagi sa 11 ka pabor,duha supak ug duha ang abstain nga ipadayon pa sa committee on the whole ang pagdungog sa sexual harassment complaint nga gidangop sa babaye nga city scholar batok ex-officio member SK Federation Pres Michael John Seno.
Kini human gibuksan ni Kag Edgar Cabanlas ang konseho kon angay ba hatagan sa pabor ang gipangayo nga 10 ka adlaw ni alyas Ivy aron mapasa ang judicial affidavit batok Seno.
Nakakita’g tsansa ang mga alyado ni Seno ug gilayong mipabor sila sa pagbasura sa reklamo samtang si Konsehal Lordan Suan ug Konsehal Jocelyn Rodriguez lamang ang kusganong uyon nga ipadayon unta ang maong pagdungog.
Samtang dismayado si Kagawad Lordan Suan ang pagbasura sa city council sa reklamo batok kang Seno.
Kini human wala panumbalinga sa mayoriya sa konseho ang apelar ni alyas Ivy nga malugwayan ang pagdungog sa reklamo kontra Seno.
Apan gipasabot ni Suan nga dili pa luwas si Seno kay mahimong madangop sa korte ang reklamo.
Dumduman nga una nang namahayag si alyas Ivy nga iduso usab nila ang reklamo batok Suan sa Office of the Ombudsman.
Sa pikas bahin,gikalipay ni Seno ang pagbasura sa iyang mga kauban sa reklamo batok kaniya.Napakyas pagdusog affidavit of complaint ang reklamante hinungdan nga nabasura ang kaso.
Hugtanong gihimakak ni Seno nga kaila niya ang reklamante ug gipaniguro nga wala siyay kalapasan batok niini.
