CAGAYAN DE ORO CITY– Langkaton sa walay pagduha-duha ni City Mayor Rolando ‘Klarex’ Uy ang bisan kinsa nga mga empleyado sa city hall nga masampon mamaligya o mogamit sa ilegal nga droga samtang nag-trabaho sa dakbayan.
Kini ang gipaabot nga mensahe sa mayor pinaagi sa iyang tigpamaba nga si Janboy Actub.
Gihimo ni Actub ang pahayag nunot sa interbyu sa Bombo Radyo kabahin sa usa ka 33 anyos nga job order workers sa Office of the Community Affairs nga nasikop sa Bulua Police Station 7 sa anti-illegal drug buy bust opration sa Brgy 16 sa miaging gabii.
Siya miingon nga wala sa kinaiya sa mayor nga palabyon ang mga kasal-anan sa mga empleyado ilabina kon klaro nga tinuyuan ug naghatag negatibong dungog sa city govt.
Dumduman nga may gilusad nga sorpresa nga drug test sa miaging mga bulan aron masiguro nga walay mga drug pusher ug mga adik nga gipang-suwelduhan nga trabahante ang katawhan sa dakbayan.
